وحشتيني

النهاردة اليوم العاشر .. مفيش حياة .. مفيش نفس .. مفيش قدرة على عمل اي شئ

هحاول اكتب واطلع كل اللي في دماغي على ورق وارتاح .. فتحت المدونة بتاعتي .. لقيت اخر مقال كله عنها. (بخاف عليكي) مقدرتش اكمله للآخر .. مش قادر فعلا

انا مش مرتبط .. يمكن ده سر تعلقي الشديد بيها !! معرفش !! بس انا كنت بحبها جدا .. بحبها اوي

كنت متخيل ان الحياة هتحس على دمها وتوقف بعد اللي حصل .. موقفتش .. وكملت عادي خالص .. بتبصلي من فوقي لتحتي بكل قسوة وسامع صوتها بتقول اللي بعده !!

حاسس اني مش موجود. جسمي مع الناس وعقلي وروحي في حته تانيه .. ضحكي مش ضحكي وحركتي مش بتاعتي .. بس مش عاوز ابان ضعيف .. يلا نتعامل عادي محدش هياخد باله ..

نفسي الحياة تجري والزمن يجري بسرعه اوي .. سرعه تخليني مقدرش اخد نفسي و اقول انا فين !! عاوز ملحقش ابص على حاجة .. مش عاوز اخد بالي انها مش موجودة او ادخل كل ساعة اطمن عليها واقولها ايوة يا كوكا.

بصحى بليل على صوتها .. كان ليها اتنين جورج بسمعها .. واحدة وهي بتنده عليا عادي وواحدة الساعة 3 الا عشرة بتاعت الالم الشديد...

انا خايف ... خايف اوي .. خايف اشوف اي حاجة من غيرك .. النهاردة في الكنيسة افتكرتك اما كنت بوصلك بعد الكنيسة ..

اول ليله من غيرك كانت صعبة اوي في البيت .. اول سهرة كانت الكنيسه ناقصاكي !! مكنش في تسبحة بطعم النهاردة ..

خايف من كل اول جاية !! ... اول قداس واول عيد واول تعب ليا واجي اتدلع عليكي اول بصخه واول و اول..

كل اول كاني بعيش يوم انتقالك من اوله بنفس آلمه ...

الناس نزلت شغلها وكملت حياتها طبيعي .. والحياة بكل قبحها وبجاحتها موقفتش .. الشمس طلعت عادي .. وقالت هكمل ..

بقول لنفسي: انت متهيألك انك عايش وانت مت في نفس الدقيقة.

انت فقدت الأمل في الحياة .. انت فقدت الهدف !! لأ .. انت فقدت الحياة !