مزاد احاسيس

أيوة يا بيه ، ايوه ياهانم ، قرب سعادتك ، قربي سعادتك ..
عندنا مزاد .. حنبيع أخيرا .. حنبيع حاجة الكل محتاجها !! 

نبيع ايه .. نبيع ايه .. 

نبيع خشب ، نبيع سجاد ، نبيع شقة فى عمارة ، ولا نبيع دولاب 

نبيع ساعة فالصو .. ولا نبيع ..........

أقولكوا انا عاوز ابيع حاجة الكل محتاجها ........ نبيع أحاسيس !! 

بس دى رخيصة أوى .. دى ممكن حتى تتباع ببلاش !! 

مش مهم ... حتى لو حنخسر فيها .. المهم نبيع .. 

نبيع ببلاش .. نبيع وخلاص ... 

معانا احساس الكل حسّه : احساس حب ، احساس طالع من القلب ، مليان رومانسية وجمال ، احساس يخطفك ، احساس يخليك ملك على كل الدنيا فى لحظه ، احساس تبقى مبسوط معاه ، حاسس انك لقيت نفسك كوبى جوه انسان ، مش عاوز حاجة تانية خلاص ، 

تموت ؟  .. آه ، أموت .. مش مهم دى اللحظة منه تشبع نفسك سنين وسنين !!  

ومعانا احساس البعض حسّه : احساس جفا ، احساس حزن ، لما تلاقى رفض لأول إحساس ، بتدي قلبك هدية لحد ، لقيته بيقولك سورى !! قلبك مايناسبنيش .. قلبك كبير أو صغير عليا .. قلبك ده صعب يكون ليا .. خلينا إخوات أو خلينا إصحاب .. ده أحلى رد مُجاملة بيتقال .. ولا بتبقوا إخوات بجد ولا حتبقوا إصحاب بجد .. اصله قلبك كان عامل زى سجادة اتفردت على الأرض ومينفعش تلمها !! حلك ساعتها .. تاخد بعضك من سكات .. وتلم اللى باقى من قلبك وتهرب  .. يمكن تعرف تصحى اللي مات !! 

معانا احساس جديد : احساس ثقة ممكن تقلب على غرور ، احساس انا اكيد الصح ، وانت اكيد الغلطان ، احساس ميقبلش انى حتى اسمعلك .. احساس بيقول أنا وبس ، تيجى تنصحه يقولك ( انت اللى حتنصحنى ؟ ) انت دخلت جوايا وعرفت انا فعلا ايه .. فبدل ما يسمع النصيحة ويتعلم  ، يزيد فى غروره وكبريائه .. ويبتدى ينصب لنفسه أكبر فخ ، يزينه بألوان جميلة فى مكان عالى قدام كل الناس .. أيوة ماهو انا اللى بتكلم ومفيش حد زيي .. نصب الفخ لنفسه وهو الوحيد اللى خسر ، بنى الفخ لوحده بلون جميل وفى مكان عالى .. وسقط قدام كل الناس !! 

معانا احساس جديد : اه ، احساس الرجل الدينى القويم !! فى الواقع يا إبنى .. انت هالك لا محالة .. وحالتك حالتها حالة !! بحاول اقلد صوته وكلامه .. شايف نفسه قديس .. وهو من جوه ابليس !! بدأ ينصح فى الناس .. وهو لسه بيطلع أول سلمة .. وبدل ما يبص على سلمته التانية .. انشغل بالناس اللى حواليه وبدأ يوزع من خبرته الروحية اللى متجيش بنص جنيه !! .. الناس طلعت ووصلت .. وهو لسه فى أول سلمه !! 

احساسنا المرة دى مختلف : احساس الحسد والحقد ، مين ده اخويا !! لا قصدك اللى كان اخويا .. عاوزنى اتمناله الخير .. افرحله من قلبى بجد ، احبه زي نفسى .. ماهو ده اللى قاله ربى .. 

لا .. مستحيل .. يجى ايه ده جنبي .. يجى ايه ده فى ذكائى وقدراتى .. ياااااااااااااااااه .. فاكر نفسه بيفهم عنى 

افرحله على ايه ؟ عروسته .. خسارة فيه اكييييييييد
شغله .... كله بالواسطة والكوسة .. بلد فاشلة اكييد

طيبته .. يااااااااه كل ده تمثيل عليكوا .. امتى حتفوقوا بقى .. 

ويبقى لسان حاله : يالا الحمد لله والشكر لله .. ملناش دعوة بحد بقى !! 

وده احساس موجود بكثرة : بيبقى عاوز حاجتين ، عاوز يبقى فى حالة حب على طول .. طلع من حالة راح لتانية على طول .. يالا يابا .. مش حنضيع وقت .. عاوزين نحب !! قصدى عاوزين نتحب !! محتاج انى احس انى جميل ، أمور ، شخصيتى حلوة .. عاوز احس ان فى حد بيموت فيّ ؟ فكّر لثانية واحده بس .. الإحساس ده موجود من زمان !! 

معانا احساس يأس : احساس جديد فى العالم ده .. اتغيّر ؟؟ ممممم .. خلاص ضاع الوقت .. مبقاش فى فرصة .. انا كدة كدة خلاص مفيش منى أمل .. طب يابنى حاول بس وانا اديك المعونة .. لأ ، انا لسه حجرب تانى (يمكن انجح ؟ والزق بسرعه جمبها احتمال الفشل اكييييد ) .. لأ خسارة وقت التجربة .. انا كدة كدة فاشل .. فشلت فى كل المحاولات اللى فاتت اللى حينجحنى المرة دى ؟؟ خلينا زى ماحنا قاعدين .. ناخد ( الوزنة ) وندفنها ... مش قصدى وزنة موهبة أو ذكاء أو مال .. قصدى وزنة روحية (الروح القدس) .. حدفنه جوايا .. مش قادر اسمع صوت تبكيت .. خلينى كدة .. اكيد مفيش جديد !! 

يااااااااااااااااااه .. كل دى احاسيس .. ياراجل احنا لسه قولنا حاجة ..  لسه فى الكتير والكتير 

طب والعمل .. عاوزين نبيع ؟؟ 

يالا مين حيشترى ؟؟ يالا ياباشا اشترى .. يالا يا هانم جرّبى ؟؟ 

نفسى محدش يشترى .. مش عاوز ابيع .. مش عاوز اكسب وغيرى يخسر ؟؟ 

انا عاوزك انت اللى تبيع .. شايف نفسك فين وفى انهى احساس : الحبّيب ولا المجروح ؟ المغرور ولا المتدين ظاهريا ؟ الحقود ولا اللى فى يأس على طول ؟؟ 

مش مهم تقولى انت فين .. انا كنت جاي ابيع احاسيس .. بس خلاص شطبنا .. مش حبيع !! 

انا عاوزك انت اللى تبيع !! 

بيع احساسك اللى لقيت نفسك فيه !!